Tongasoa eto amin'ny FJKM Ambohimamory Malala Orimbato

Ho voninahitr’Andriamanitra izay efa naniraka ny Fiangonany , ho vavolombelon’ny fitiavany ny olombelona rehetra tsy misy an-kanavaka , no hanoloranay ity tranokalam-pifandraisan’ny FJKM Ambohimamory Malala Orimbato ity ho antsika rehetra .

Nosokafana ity tranokala ity , ho tsangambaton’ny faha-140 taonan’ny Fiangonana (1869 -2009) , hijoroany vavolombelona fa :
- Ny asany dia ny mitory ny Filazantsaran’i Jesoa Kristy Mpamonjy izao tontolo izao ary izy no vavolombelon’ny fitiavany sy ny famonjeny , ho an’ny olona rehetra .
- Ny Fiangonana dia misokatra ho an’ny olona rehetra tsy misy an-kanavaka ary vonona handray ny hafa , amin’ny fitiavana sy ny fifaliana .
- Ny Fiangonana dia mivelatra amin’ny any ivelany fa tsy ‘’voafefin’ny rindrin’efatry ny trano Fiangonana’’ , araka ny Tenin’ny Tompo hoe ‘’ fa hahazo hery hianareo amin’ny hilatsahan’ny Fanahy Masina aminareo ,ary ho vavolombeloko …hatrany amin’ny faran’ny tany » (Asan’ny Apostoly 1 :8).
- Ny Fiangonana dia maniry ny hifanerasera amin’ireo zanany rehetra maneran-tany, na aiza na aiza misy azy.

Noho izany , ity tranokala ity dia fomba hanehoan’ny Fiangonana ny fahavononany hiresaka sy hifanerasera aminao , ny fitiavany ny olona rehetra ka hitoriany ny Vaovao Mahafaly , milaza ny famonjen’i Jesoa Kristy .
Koa aza misalasala mitsidika anay eto amin’ity tranokalam-pifandraisana ity .

Mahereza ary mazotoa fa hifamangy mandrakariva eto isika !

Ny Mpitandrina : RANDRIAMISATA Roger